श्रीहरि सत्संग समिति नेपालको विराटनगरमा ऐतिहासिक रासलीला कार्यक्रम सम्पन्न

विराटनगर/ श्रीहरि सत्संग समिति नेपालको केन्द्रीय कार्यालय विराटनगरले आयोजना गरेको ६ दिने ऐतिहासिक रासलीला कार्यक्रम आइतबार भव्य रूपमा सम्पन्न भएको छ। ५ गतेदेखि सुरु भएको यस कार्यक्रमले १० गतेसम्म १२ हजार भन्दा बढी भक्तजनहरूको सहभागिता प्राप्त गरेको थियो। कार्यक्रमको समापन अवसरमा विभिन्न धार्मिक र सांस्कृतिक हस्तीहरू, राजनीतिक तथा समाजसेवी व्यक्तित्वहरूको उपस्थितिमा कार्यक्रम सम्पन्न भएको हो।

यस रासलीला कार्यक्रममा प्रमुख अतिथिहरूका रूपमा कोशी प्रदेशका प्रदेश प्रमुख पर्शुराम खापुङ, भारतको हैदरावादका स्वामी रामानुज चिन्न जिअर, नेपाली कांग्रेसका केन्द्रीय सदस्य एवं कोशी प्रदेश सांसद अमृत अर्याल लगायतका प्रमुख नेताहरूको उपस्थिति रहेको थियो। साथै, रंगेली नगरपालिकाका मेयर दिलिप बगडिया, कटहरी गाउँपालिकाका अध्यक्ष देवराज चौधरी, मोरङका प्रमुख जिल्ला अधिकारी इन्द्रदेव यादव लगायत विभिन्न अधिकारी र समाजसेवीहरूले कार्यक्रमको समापनमा सहभागी भए।

यस वर्षको रासलीला कार्यक्रम भारतको वृन्दावनबाट आएका २१ जना कलाकारहरूको टोलीले भगवान श्री राधाकृष्णको जीवनशैलीमा आधारित रासलीला प्रस्तुत गरेका थिए। कार्यक्रमको दौरानमा विराटनगरका एक दर्जनभन्दा बढी सञ्चारकर्मीहरूलाई सम्मानित पनि गरिएको थियो।

श्रीहरि सत्संग समिति नेपालले रासलीला कार्यक्रमको आयोजनामा ८.५ लाख रुपैयाँ भन्दा बढी खर्च गरेको जानकारी दिएको छ। यस कार्यक्रमका प्रमुख संयोजक महेशकुमार साह स्वर्णकार र सहसंयोजक घनश्याम काबराले कार्यक्रमको सफलतामा महत्त्वपूर्ण भूमिका निभाएका छन्।

श्रीहरि सत्संग समिति नेपालका अध्यक्ष भिखमचन्द सरलले रासलीला कार्यक्रमलाई वृन्दावनबाट विराटनगरसम्म ल्याउने प्रयास सफल भएकोमा खुशी व्यक्त गरे।