‘होस्टेल ३’ को बक्सअफिसमा उत्कृष्ट प्रदर्शन, ४ करोडको आँकडातर्फ अग्रसर

काठमाडौं / नेपाली चलचित्र ‘होस्टेल ३’ ले घरेलु बक्सअफिसमा उत्कृष्ट व्यापार गरिरहेको छ। शुक्रबारदेखि तेस्रो सातामा प्रवेश गरेको यो फिल्मले ठूला ब्यानर र ठूला स्टारका फिल्मलाई समेत कमाइमा चुनौती दिएको छ।

सशान कँडेल ‘सन्तोष’ द्वारा निर्देशित यो फिल्मले तेस्रो सप्ताहन्तसम्म ४ करोड रुपैयाँको आँकडा पार गर्ने प्रक्षेपण गरिएको छ। संचार तथा सूचना प्रविधि मन्त्रालयको बक्सअफिस अनुसार, फिल्मले पहिलो दुई सातासम्म देशभरबाट ३ करोड ६७ लाख रुपैयाँ ग्रस कमाइ गरेको छ।

तेस्रो हप्ता प्रवेश गर्दा पनि फिल्मलाई ६० शो प्राप्त भएको छ, जुन सुखद मानिन्छ। फिल्मको ‘वर्ड अफ माउथ’ बलियो भएकाले आगामी दिनमा अझै राम्रो व्यापार हुने अपेक्षा गरिएको छ। विकडेज (आइतबारदेखि बिहीबारसम्म) को अकुपेन्सी पनि अपेक्षाकृत राम्रो देखिएको छ।

‘होस्टेल ३’ मा नयाँ अनुहारका कलाकार र डेब्यु निर्देशक भए पनि फिल्मको अघिल्लो श्रृंखलाको लोकप्रियताले यसलाई ठूलो फाइदा पुगेको देखिन्छ। इतिहासकै सफल बक्सअफिस ट्र्याकमा उभिएर ‘होस्टेल ३’ ले आफूलाई सुपरहिट बनाएको छ।

फिल्ममा पारस बम (कुल ब्वायको भूमिकामा), सिम्रन पन्त, रिहान गिरी, आशिष घिमिरे, पदम तामाङ लगायतका कलाकारको दमदार अभिनय देख्न सकिन्छ।

‘होस्टेल ३’ ले नेपाली बक्सअफिसमा नयाँ उचाइ कायम गर्ने सम्भावना देखिएको छ।