विराटनगर वडा नं.१२ को नवदुर्गा मन्दिरमा दुई दिने बिजया दशमी समारोह

विराटनगर / श्री नवदुर्गा मन्दिर सेवा समितिले यस वर्षको बिजया दशमीको अवसरमा दुई दिने विशेष कार्यक्रमको आयोजना गरेको छ। “सेवा नै धर्म हो” भन्ने मूल नाराका साथ आयोजित यो कार्यक्रम विराटनगर-१२ स्थित बखरीमा रहेको श्री नवदुर्गा मन्दिर प्राङ्गणमा भईरहेको छ।

कार्यक्रम असोज २५ र २६ गते बेलुकी ४:०० बजेदेखि सञ्चालन भईरहेको जनाइएको छ। यस अवसरमा विभिन्न धार्मिक तथा सांस्कृतिक कार्यक्रमहरू प्रस्तुत गरिने पूजा समारोह समितिका संयोजक गणेश खड्काले बताए।

श्री नवदुर्गा पूजा समारोह समितिद्वारा आयोजित यस कार्यक्रममा स्थानीय समुदायका साथै टाढाबाट आउने भक्तजनहरूको उल्लेख्य सहभागिता हुने अपेक्षा गरिएको समारोहका साह संयोजक कालिकन्त कामतले बताए ।

त्यसैगरी विराटनगर -१२ का वडा अध्यक्ष हिरालाल कामतका अनुसार “यो कार्यक्रमले हाम्रो समुदायमा धार्मिक एकता र सांस्कृतिक सद्भाव बढाउन मद्दत गर्नेछ।”

विगत वर्षहरूमा जस्तै यस पटक पनि विशेष पूजा अर्चना, भजन कीर्तन, र प्रसाद वितरणको व्यवस्था गरिएको छ। साथै, स्थानीय कलाकारहरूद्वारा सांस्कृतिक कार्यक्रम प्रस्तुत गरिने कार्यक्रम रहेको विराटनगर १२ का वडा सदस्य कुशेश्वर राजवंशीले जनाए ।

आयोजक समितिले सबै भक्तजन तथा स्थानीयवासीहरूलाई यस पावन अवसरमा सहभागी हुन हार्दिक निमन्त्रणा गरेको छ। कार्यक्रमस्थलमा सुरक्षा र स्वास्थ्य सावधानीको पूर्ण ध्यान दिइने पनि समितिले जनाएको छ।