हुँगा खोलामा एक बेवारिसे शव फेला परे

सोलुखुम्बु। सोलुखुम्बुको सोताङ गाउँपालिका ५ स्थित हुँगा खोलामा एक बेवारिसे शव फेला परेको छ। सोताङ गाउँपालिका ४ र ५ हुँदै बग्ने उक्त खोलाको ढुङ्गाको छेउमा सडिसकेको अवस्थामा बिहीबार शव भेटिएको जिल्ला प्रहरी कार्यालय सोलुखुम्बुले जनाएको छ।

प्रहरी निरीक्षक अनिल मिश्रका अनुसार बिहीवार साँझ करिब ५ बजे स्थानीयले शव भेटिएको बारे इलाका प्रहरी कार्यालय सोताङमा खबर गरेका थिए। जानकारी पाएलगत्तै सोताङबाट खटिएको प्रहरी टोलिले सो स्थानमा पुगी घटनास्थल सुरक्षित गरेको छ।

पहाडी मुलको जस्तो देखिने उक्त शवको लिङ्ग र वतन खुल्न नसकेको प्रहरी निरीक्षक मिश्रले बताए। शव सडिसकेको अवस्थामा रहेकाले पहिचान गर्न समस्या भएको छ। घटनाको विषयमा अनुसन्धान भइरहेको जिल्ला प्रहरी कार्यालय सोलुखुम्बुले जनाएको छ।