नेपाल पत्रकार महासंघका पूर्व अध्यक्ष पाण्डेको निधन

हेटौंडा। नेपाल पत्रकार महासंघ मकवानपुरका पूर्व अध्यक्ष कौशल पाण्डेको निधन भएको छ। उनको ७५ वर्षको उमेरमा बिहीबार साँझ ५:४५ बजे हेटौंडा –४ कमलडाँडास्थित निवासमा निधन भएको हो।

लामो समयदेखि क्यान्सर रोगसँग लड्दै आएका उनलाई केही महिना अघिदेखि लिभर सिरोसिको कारण शल्यक्रिया गरिएको थियो। शल्यक्रियापश्चात उनको स्वास्थ्य अवस्था जटिल बन्दै गएको थियो। मकवानपुरे पत्रकारिताका संस्थापक मध्येका एक पाण्डेको निधनले पत्रकारिता क्षेत्रमा अपुरणीय क्षती पुगेको भन्दै पत्रकार महासंघ मकवानपुरले शोक विज्ञप्ति जारी गरेको छ।

पाण्डेले लामो समय शिक्षण पेशामा पनि योगदान दिएका छन्। उनी क्रान्तिकारी पत्रकार संघ मकवानपुरका संस्थापक अध्यक्ष, प्रेस सेन्टर नेपालका केन्द्रीय सल्लाहकार, श्यामप्रसाद शर्मा स्मृति प्रतिष्ठान मकवानपुरको अध्यक्ष थिए। उनकै प्रकाशन सम्पादनमा मकवानपुरको पुरानो ‘प्रयास अर्धसाप्ताहिक’प्रकाशन हुँदै आएको छ।