एक युवाले एकै परिवारका तीन जनाको हत्या गरे

उदयपुर। उदयपुरको बेलका नगरपालिका—७ गौधाटारमा एक युवाले शुक्रबार एकै परिवारका तीन जनालाई धारिलो हतियार प्रयोग गरी हत्या गरेका छन्। घरबाट खेती गर्न जाँदै गरेका स्थानीय ३७ वर्षीय राजकुमार बस्नेत, उनकी श्रीमती ३० वर्षिया सरिता बस्नेत र १२ वर्षीय छोरा सुजन बस्नेतको हत्या भएको हो।

हत्यालगत्तै फरार रहेका आरोपित ४० वर्षीय नरबहादुर बस्नेतलाई नियन्त्रणमा लिएको जिल्ला प्रहरी कार्यालयका सूचना अधिकारी डीएसपी राकेश पोदारले जानकारी दिए। आरोपितले राजकुमारलाई खेतीमा जाँदै गरेको अवस्थामा चौबाटे कुलो र आमा छोरालाई स्थानीय बबिङ खोलामा खुकुरी प्रहार गरी हत्या गरेको उनले बताए। हत्या गर्नुको कारण खुलेको छैन।

बेलकाका मेयर अशोक कार्कीका अनुसार घटनास्थल नगरपालिकाको विकट क्षेत्रमा पर्छ।