प्रधानमन्त्री ‘प्रचण्ड’ र सभामुख घिमिरेबीच भेटवार्ता

काठमाडौं / प्रधानमन्त्री पुष्पकमल दाहाल ‘प्रचण्ड’ र सभामुख देवराज घिमिरेबीच भेटवार्ता भएको छ। सभामुख घिमिरे प्रधानमन्त्री प्रचण्डसँग छलफल गर्न सोमबार बिहान प्रधानमन्त्री निवास बालुवाटार पुगेका हुन्।

प्रधानमन्त्री र सभामुखबीच समसामयिक विषयवस्तुमा छलफल भइरहेको बालुवाटार स्रोतले जनाएको छ।उनीहरुबीच संसद्लाई प्रभावकारी बनाउने, समग्र संसदीय गतिविधिका बारेमा छलफल भएको प्रधानमन्त्री सचिवालयले जनाएको छ।

प्रतिनिधिसभाको सभामुखमा माओवादी केन्द्रसहित सत्ता साझेदार दलको तर्फबाट नेकपा एमालेका उम्मेदवार घिमिरे निर्वाचित भएका हुन्। बैठकमा सहभागी २६८ सांसदमध्ये १६७ मतसहित घिमिरे निर्वाचित भएका हुन्। प्रतिस्पर्धी कांग्रेस उम्मेदवार ईश्वरी न्यौपानेले १०० मत ल्याएकी थिइन्। घिमिरे झापा-२ बाट निर्वाचित सांसद् हुन्। सभामुखमा निर्वाचित भएपछि घिमिरेले एमाले पार्टीबाट राजीनामा दिएका छन्।