ट्रकको ठक्करबाट घाइते स्कुटर चालकको उपचारको क्रममा मृत्यु

झापा। ट्रकको ठक्करबाट घाइते स्कुटर चालकको उपचारको क्रममा मृत्यु भएको छ । मृत्यु हुनेमा दमक नगरपालिका-४ निवासी ६८ वर्षीय राम जुलुम नायक रहेको प्रहरी कार्यालय झापाका डीएसपी वसन्त पाठकले जानकारी दिए ।

प्रहरीका अनुसार साउन २७ गते बिहान ९ बजेर ४० मिनेटमा पूर्व पश्चिम राजमार्ग अन्तरगत दमक-४ स्थित चिया दोकान नजिकै पश्चिमबाट पूर्वतर्फ जाँदै गरेको ना ८ ख ३३३३ नम्बरको ट्रकले दक्षिणबाट उत्तरतर्फ बाटो काट्दै गरेको प्रदेश नं. १-०४-००१ प २४५५ नम्बरको स्कुटरलाई ठक्कर दिएको थियो । दुर्घटनामा परी घाइते भएका स्कुटर चालक नायकलाई निम्स अस्पताल दमक लगेको र त्यहाँ उपचार सम्भव नभएपछि थप उपचारको लागि विराट नर्सिङ होम विराटनगर पठाइएको थियो ।

सोही अस्पतालमा उपचारको क्रममा नायकको मंगलबार बिहान १० बजे मृत्यु भएको हो । ट्रक चालक अर्जुनधारा नगरपालिका-५ निवासी ३८ वर्षीय मातृका दनुवार र दुवै गाडीलाई इलाका प्रहरी कार्यालय दमकले नियन्त्रणमा लिएको छ।