विराटनगरमा मध्यराति भारतीय नागरिकले छुरा आतंक मच्चाए

विराटनगर । विराटनगरको एउटा ‘गीत गजल’मा बुधबार मध्यराति भारतीय नागरिकले छुरा आतंक मच्चाएका छन् । प्रहरीका अनुसार ग्राहाक बनेर विराटनगर महानगरपालिका–११ नयाँ गुद्रीस्थित लोटस गीत गजलमा छिरेका तीन जना भारतीय नागरिकले राति ११:१५ बजेतिर छुरा आतंक मच्चाएका हुन् ।

‘गीत गजल’मा केही समय खानपिन गरेर बसेका उनीहरुले पैसा तिर्ने बेलामा विवाद गर्दै कामदारमाथि छुरा हानेका हुन् । छुरा प्रहारबाट गीत गजलका कामदार विराटनगर–१५ का २२ वर्षीय सोनु साह घाइते भएका छन् । पेटमा चोट लागेका उनको विराटनगरस्थित विराट नर्सिङ होम एवं विराटनगर अस्पतालमा उपचार भइरहेको मोरङ प्रहरीका प्रवक्ता डीएसपी दीपक श्रेष्ठले जानकारी दिए । अत्यधिक रक्तश्राव भए पनि अवस्था खतरामुक्त रहेको अस्पतालले जनाएको छ । प्रहरीका अनुसार विन्देश्वर यादवले सञ्चालन गरेको गीत गजलमा खानपिन गरेको पैसा तिर्ने विषयलाई लिएर भारतीयले विवाद गरेका थिए ।

विवादका क्रममा आफूसँग रहेको छुरा निकालेर कामदारमाथि प्रहार गरेको पाइएको डीएसपी श्रेष्ठले बताए । उनका अनुसार छुरा प्रहार गर्नेमध्ये भारत टिकुलियाका २१ वर्षीय विक्की पोदारलाई पक्राउ गरिएको छ । छुरा प्रहार गरेर भाग्दै गरेका बेला लडेका पोदारलाई वडा प्रहरी कार्यालय विराटनगरका डीएसपी दीपेन्द्र पञ्जीयार थारु नेतृत्वको टोलीले नियन्त्रणमा लिएको हो ।

घटनामा संलग्न अन्य दुई जना फरार भएका छन् । फरार भएकाको खोजी तीव्र पारिएको प्रहरीले जनाएको छ । गीत गजलका कामदारमाथि पोदारले छुरा प्रहार गरेको र अरु दुई जनाले उनलाई साथ दिएको प्रहरीले जनाएको छ । ‘ग्राहाक बनेर आएका भारतीय नागरिकले खानपिन गरेको पैसा तिर्ने विषयलाई लिएर विवाद गरेछन् । उनीहरुलाई गीत गजलका कामदारले बाहिर निकाल्न खोज्दा झन् विवाद बढ्यो,’ डीएसपी श्रेष्ठले भने, ‘त्यसपछि आफूसँग रहेको छुरा निकालेर एक्कासि कामदारको पेटमा प्रहार गरेको पाइयो । घटनाका सम्बन्धमा थप अनुसन्धान भइरहेको छ ।